Fritid

Da Noreg arrangerte dei olympiske vinterleikane (OL) på Lillehammer i 1994, var det Kongen som opna leikane. Kongen var også sjølv idrettsutøvar i mange år. I barndommen prøvde han mange ulike idrettar, men det er segling som er spesialiteten til Kongen.

Segling

Kong Harald og mannskapet hans vart verdsmeistrar i segling i 1987 og europameistrar i 2005. Han har delteke i OL heile tre gonger og var aktiv som konkurranseseglar heilt til 2022 - da var han 85 år. Kongen har hatt mange seglbåtar. Nesten alle har heitt Fram, akkurat som skipet til polfararen Fridtjof Nansen. Kongen har også vore trenar for ei gruppe unge lovande seglarar. Seglbåten, ”Fram XV" (Fram nummer 15) gav han til Norges Seilforbund for at ungdommane kunne bruke han i treninga.

Kong Harald er veldig glad i å segle. Foto: Ole Berg-Rusten/ NTB Scanpix

Båtane Kong Harald seglar mest med no, heter Fram XVIII (det betyr Fram nummer 18) og Sira.

Jakt og fiske

Kong Harald er glad i å vere ute i naturen og driv med både jakt og fiske. I jaktsesongen om hausten liker Kongen å vere på hytta i Sikkilsdalen, som ligg aust i Jotunheimen. Da er han som regel saman med dei gode vennene han har i jaktlaget sitt, og dei går på elgjakt.

Nokre gonger blir det servert retter med elg frå Sikkilsdalen på gallamiddagar på Slottet. På jakt har Kong Harald med seg dei to hundane sine, Gila og Java. Dei er begge engelske setterar. Kongen liker godt å fiske med fluge, og han kjenner mange av lakseelvane i landet. Kong Harald har fiska nesten heile livet. Det blir sagt at han fekk sin første fisk da han var 3 år og var på flukt i Sverige under den andre verdskrigen.

Kongen er glad i å fiske med flue. Foto: Thor Nielsen

Barnebarn

Elles bruker Kongen også ein del av fritida si saman med barnebarna. Han set stor pris på at dei kjem på besøk på Slottet, eller til Bygdø kongsgård og Mågerø, der Kong Harald og Dronning Sonja bur om sommaren. Som besteforeldre flest ønskjer dei å bli godt kjende med barnebarna sine.